Opnar spurningarÞegar unnið er með söguaðferðinni er byrjað á að spyrja opinna spurninga til að finna út hvað nemendurnir vita, halda eða geta ímyndað sér. Þetta er oft gert með hugstormun. Kennarinn spyr og nemendur svara. Svörin skrifar kennarinn niður eins hratt og hann getur. Opnar spurningar hafa ekki eitt rétt svar heldur geta svörin velt upp ýmsum möguleikum, sem aftur vekja umræður. Tilgangurinn með þessu upphafi er að fá nemendur til að hugsa sjálf, rifja upp eða að reyna að gera sér í hugarlund allt eftir þeirra reynslu og þekkingu. Þegar hugstormuninni er lokið hefjast nemendur handa við að búa til, ræða, eða skrifa um svörin við opnu spurningunni. Þegar öllu þessu er lokið fara nemendur og skoða eða lesa um það raunverulega. Stundum skoða þeir það raunverulega á eftir hugstormuninni, áður en þeir skrifa eða teikna.
|
DæmiTökum lítið dæmi. Við spyrjum: Hvernig haldið þið að víkingaskip hafi verið? Nemendur koma með ýmsar uppástungur munnlega og síðan koma nokkrir upp á töflu til að teikna sínar hugmyndir. Bekkurinn ræðir hugmyndirnar og gerir leiðréttingar. Því næst fara þeir og skoða myndir af víkingaskipum og lesa um þau áður en þeir hefjast handa við að búa þau til. Þegar þessi háttur er hafður á vita nemendur hverju þeir eru að leita eftir þegar þeir afla sér fróðleiks.
Hugsum annað dæmi: Kennarinn byrjar kennslustund á að biðja nemendur um að vera blaðamenn og skrifa frétt um atburð sem gerðist við fuglabjarg fyrir vestan. Kennari spyr: Hvernig finnst ykkur að eigi að skrifa frétt? Hver eru einkennin? Hvernig eru fyrirsagnir og svo framvegis. Alls konar hugmyndir koma. Nokkrar fyrirsagnir eru skoðaðar. Nemendurnir setja sig í fréttamannsstellingar og skrifa frétt. Á eftir lesa þeir nokkrar fréttir til að bera saman við þeirra fréttir. Þegar unnið er með söguaðferðinni er þannig reynt að ýta undir fjölbreytt vinnubrögð og einnig vinna nemendur ýmist einir eða í misstórum hópum. |
Reynsla KársnesskólaSöguaðferðin hefur nú verið notuð í Kársnesskóla í öllum bekkjum síðan 1993. Óhætt er að segja að reynslan er góð og leita bæði íslenskir kennarar og erlendir til kennara í skólanum eftir fróðleik um vinnu með söguaðferðinni. Frá byrjun hefur samfélagsfræði verið kennd að mestu með söguaðferðinni og einnig nokkuð af kristinfræði og náttúrufræði. Íslenskukennsla er alltaf fléttuð inn í allt sem unnið er með söguaðferðinni og einnig er samþætting við aðrar greinar eftir því sem þykir heppilegt hverju sinni.
Þrisvar sinnum hafa verið haldin kennaranámskeið í Kársnesskóla til að kynna söguaðferðina og hefur þátttaka verið mjög góð. Þá höfum við haft tækifæri til að sýna afrakstur vinnunnar í hinum ýmsu bekkjardeildum í skólanum og hefur það verið mjög gaman. Okkur finnst að þessi vinna hafi gengið vel og að nemendur okkar hafi verið áhugasamir. Vitað er að þegar nemendur eru áhugasamir læra þeir mikið. Við kennarar erum stolt af vinnunni með söguaðferðinni. |